O PP veta mellorar o tratamento do linfedema

O PP veta mellorar o tratamento do linfedema

O PP veta mellorar o tratamento do linfedema

O portavoz de Sanidade do Grupo Socialista, Julio Torrado, reclamou hoxe a posta en marcha de unidades multidisciplinarias “reais” para o tratamento do linfedema na sanidade pública de Galicia. Lamentou o “veto insensible” do PP a unha proposta dirixida a reforzar os medios para atender aos pacientes dunha enfermidade considerada “rara” pero que resulta “altamente incapacitante”.

O responsable socialista presentou esta proposta na Comisión de Sanidade celebrada hoxe na Cámara autonómica, na que cualificou de “lamentable” o voto en contra do PP a mellorar a situación destes enfermos “alegando que se trata dunha enfermidade rara que só afecta a 54.000 galegos e galegas e non hai recursos para todo”.

Lembrou que de acordo coas estimacións da Asociación Galega de Linfedema o número de afectados duplica as cifras do PP e considerou “inhumano” que discriminen a estes doentes “unicamente por unha cuestión de número, esquecendo que están a falar de persoas que sofren”.

Os socialistas reivindicaron unha maior formación dos profesionais sanitarios na detección e tratamento. Tamén reclamou a substitución das unidades “inoperantes” de linfedema por unidades multidisciplinarias “reais” que garantan unha atención acaída para os pacientes desta enfermidade incapacitante.

Tamén solicitou mellorar a prestación de prendas de compresión no marco de medicamentos con achega reducida, ampliando a súa dispoñibilidade, hoxe limitada a dúas ao ano, cando é un elemento indispensable para o tratamento da doenza. Finalmente, reclamou “que se corrixa a normativa vixente en canto á valoración e baremo para a concesión de graos de discapacidade” para estes enfermos e enfermas.

Torrado lembrou hoxe que a falla de formación dos profesionais e a precariedade de recursos provoca que haxa “moitísimos casos sen diagnosticar” no caso dunha doenza na que a detección precoz resulta “crucial”. Sinalou que o linfedema, que se ben pode ser tratado en etapas tempranas, unha vez desenvolto pode chegar a ser moi discapacitante e incluso derivar en elefantiasis ou linfangiosarcoma.

A falla de formación e información provoca que non se realicen as derivacións necesarias aos especialistas nin as probas específicas, que ademais se realizan con demoras excesivas pola saturación das listas de espera. Ademais, a falla de persoal nos servizos de rehabilitación provoca a saturación dos recursos, impedindo un tratamento axeitado e obrigando aos afectados a recorrer a medios privados.

jacobo

Artigos relacionados

Deixar a resposta

Pechar