Santiago de Compostela, 07 de febreiro de 10. A portavoz de Pesca do Grupo Parlamentario dos Socialistas de Galicia, Marisol Soneira, esixiu hoxe á Xunta que presente os informes legais e medioambientais preceptivos para levar adiante a reforma do Plan de Acuicultura anunciada polo presidente da Xunta o pasado 28 de xaneiro. Soneira presentou unha Interpelación parlamentaria na que acusa ao mandatario autonómico de “primar a especulación e marbellización” do mellor da nosa costa.

Soneira advirte que a modificación do Plan Galego de Acuicultura será levada adiante “sen que conste –que saibamos- ningún informe medioambiental, urbanístico nin de ningunha outra índole”, así como as valoracións xurídicas ou do Consello Económico e Social. Por este motivo presenta unha iniciativa na que esixe á Xunta que explique a qué organismos solicitou os informes previos á modificación do Plan, así como as súas conclusións.

A parlamentaria socialista salienta así que tampouco consta informe da asesoría xurídica da Xunta ou de Costas do Estado, ademais de que non especificaron qué rango legal ten a modificación puntual desta norma. De feito, engade Soneira, a decisión da Xunta aínda non foi publicada no Diario Oficial de Galicia e “non nos consta que se consultase a outras consellerías da Xunta nin a outras administracións con competencias sobre a superficie afectada”.

Sinala que “todo isto sitúanos nun escenario absolutamente confuso e preocupante xa que, lonxe da pretendida seguridade xurídica anunciada polo presidente, esta forma de proceder sitúa a acuicultura galega nunha situación insostible”. Isto é así debido a que “non sabemos o rango legal da pretendida reforma” e porque “permite a expropiación por parte da Xunta cando o propietario do terreo non estea de acordo co promotor”.

Marisol Soneria engade que a Xunta “ao parecer sen solicitar informes” toma decisións “que implican modificar o réxime de propiedade de terreos que nalgún caso son públicos ou están afectados por servidumes públicas”. Lamenta que a Xunta provoque esta situación “nun escenario onde as empresas acuícolas ven cómo se limitan os prazos para solicitar axudas europeas que fan inviables os seus proxectos investidores”.